МУГТ Г.Угалзцэцэг мятрашгүй хөдөлмөрч бүсгүй. Үүний зэрэгцээ тэрбээр бүхий л зүйлд мэдрэмжтэй ханддаг өвөрмөц ертөнцтэй эмэгтэй. Түүний нүүр номондоо нийтлэдэг бичвэрүүд олон эмэгтэйд асуудлыг өөрөөр харах, аливаад тууштай хандах эрч хүч, мессежийг авдаг. Тэрбээр хамгийн сүүлд “Анхаарал халамж догдлол төрүүлдэг үү. Мэдээж тийм. Унтаж чадахгүй босох үед чинь сайхан амарсан уу гэхэд сайхан амарсан юм шиг, хоолоо идэж амжаагүй ч хоолоо идсэн үү гэхэд цадаж байгаа юм шиг, хичнээн их ядарсан ч ядарч байна уу гэхэд хүч орох шиг тийм мэдрэмжийг догдлол гэдэг байх. Яг л зохиолыг нь уншчихаад киног нь үзэхэд нэг л дутуу санагдаад байдаг шиг, догдлолгүй бол амьдрал ч бас дутуу ажээ” хэмээн бичжээ.
