Засгийн газраас угаарын хий мэдрэх төхөөрөмжийг нийслэлийн зургаан дүүргийн гэр хорооллын өрхүүдэд нэг удаа үнэгүй олгох шийдвэр гаргаж зургаан тэрбум төгрөгөөр угаарын мэдрэгч дохиолол тавина гэж мэдэгдсэн. Түүнчлэн тус төхөөрөмжийг гадны орноос судалж байгаагаа ч мэдээлсэн.
Тэгвэл ШУА-ийн Физик технологийн хүрээлэнгийн эрдэмтэд MQ-7 мэдрэгчийг ашиглан агаар дахь угаарын хийг зөвшөөрөгдсөн хэмжээнээс давсан тохиолдолд дохио өгдөг туршилтын загварыг зохион бүтээгээд байна.
Энэхүү төхөөрөмж нь “LCD” дэлгэц дээр угаарын хийн хэмжээг “PPM” нэгжээр харуулах бөгөөд зөвшөөрөгдөх хэмжээнээс их үед дуут дохио өгөх юм. Микроконтроллерын удирдлагатай тус төхөөрөмж босго утга болон горимыг шаардлагад нийцүүлэн программчлан тухай бүрт нь өөрчилж сайжруулах боломжтой. Монгол эрдэмтэд өөрсдөө программчлах тул утгыг өөрчлөх, засварлах зэрэг олон давуу талтай аж.
Хэрвээ төр, засгаас дэмжлэг үзүүлбэл энэхүү төхөөрөмжийг Монголдоо үйлдвэрлэх бүрэн боломжтой гэж эрдэмтэд үзэж байна.
Түлш дутуу шаталтын үед угаарын хий CO үүсгэдэг. Энэ хий нь өнгө, үнэргүй учраас мэдрэгдэхгүй учраас иргэд угаартах, амь насаа алдахад хүрч байгаа билээ.
