УИХ хорт хавдрын өвчлөлийг эрт илрүүлэхийн тулд Эрүүл мэндийн тухай хууль, Эрүүл мэндийн даатгалын тухай хуульд нэмэлт, өөрчлөлт оруулах тухай хуулийн төслийг хэлэлцэж эхэллээ.
Монгол Улс хорт хавдраар өвчлөгсдийн тоогоороо дэлхийн түвшинтэй харьцуулахад зургаа, нас баралтын тоогоороо 11 дахин их байгаа нь эрт илрүүлж чадахгүй байгаатай холбоотой юм.
2018 оны байдлаар 6073 хүн хорт хавдраар өвчилж 4400 нь буюу өдөрт 12-15 хүн нас барж, гамшгийн хэмжээнд хүрч байгаад төр засаг онцгойлон анхаарах шаардлагатай гэж эрүүл мэндийн салбарынхан үзэж байна.
Тиймээс 21 аймаг, есөн дүүргийн эрүүл мэндийн төвд хорт хавдрын эрт илрүүлгийн нэгж байгуулж, хөрөнгийг улсын төсөвт суулгахад анхаарч ажиллахын зэрэгцээ цаашлаад эрт илрүүлгийн асуудлыг Эрүүл мэндийн даатгалын тогтолцоотой уяж өгөх ёстой гэсэн байр суурийг УИХ-ын гишүүд илэрхийллээ.
