2022 онд Катарт болох ДАШТ, 2023 онд БНХАУ-д зохиогдох Азийн АШТ-ий урьдчилсан шатны “F” хэсгийн эхний тоглолт 09-р сарын 05-ны 17:00 цагт Монгол, Мьянмарын багуудын хооронд болно.
Өнөөдөр тоглолтын өмнөх техникийн зөвлөгөөн болон хэвлэлийн бага хурал амжилттай болж өнгөрлөө.
Мьянмарын шигшээ багийн дасгалжуулагч Миодраг Радулович: “Би Мьянмарын шигшээ багийг дасгалжуулаад 4 сар болж байна. Миний туршлагаас үзэхэд тэмцээн бүрийн эхний тоглолт, ялангуяа талбайн эзэдтэй хийх тулаан ямагт хүнд байдаг” хэмээлээ.
Харин Майкл Вайсс дасгалжуулагч ” Унгарт гайхалтай бэлтгэл хийсэн манай залуусын дотоод уур амьсгал, бие бялдрын бэлтгэлжилт тун сайн байна. Би өмнө нь Филиппиний шигшээ багийг удирдаж байхдаа Мьянмарын эсрэг хэд хэд тулж байсан. Тэднийг хэрхэн тоглодгийг сайн мэднэ. Хоёр багт 50, 50 хувийн боломж байгаа учраас бүх хүчээ дайчлах болно.” гэдгээ мэдэгдлээ.
Монголын шигшээ багийн ахлагч Н.Цэдэнбал 2011 онд Мьянмарын эсрэг тоглож байсан туршлагатай. Түүнээс 8 жилийн хугацаанд аль баг хэрхэн өөрчлөгдсөн талаар асуухад “Энэ хугацаанд Мьянмараас илүү бид өөрчлөгдөж, сайжирсан гэж бодож байна. Өмнө нь бэлтгэл хангалттай хийж байгаагүй бол Монголын шигшээ сүүлийн жилүүдэд албан ёсны 15 тоглолтод оролцож, олон улсад бэлтгэл базаан, ихээхэн туршлага хуримтлуулсан” хэмээн өөрсдийн давуу талыг хэлээд амжсан юм.
Та бүхэн 09-р сарын 05-ны 17:00 цагт эхлэх Монгол, Мьянмарын багуудын тоглолтыг МХБХ-ны цэнгэлдэх хүрээлэнд хүрэлцэн ирж шигшээ багаа дэмжээрэй. Тэмцээний бэлтгэлээ базаасан үндэсний шигшээ багийнхан маань хөгжөөн дэмжигчдийнхээ уухайн түрлэгийг үгүйлж байна.
