Улсын Онцгой Комисс /УОК/ хуралдаж хичээлийн шинэ жилийг ирэх есдүгээр сарын 1-нээс эхлүүлэхтэй холбогдуулж дараах шийдвэрийг гаргалаа.
- Есдүгээр сарын 1-нээс Цэцэрлэг, ерөнхий боловсролын сургуулийн хичээл,
- Есдүгээр сарын 14-нөөс Мэргэжлийн сургалт, үйлдвэрлэлийн төвийн хичээл,
- Аравдугаар сарын 5-наас Их, дээд сургууль, коллежийн хичээл эхэлнэ.
Хичээлийг танхимын болон теле хичээл, цахим гэсэн хосолсон хэлбэрээр явуулах бөгөөд сум, баг, тосгоны сургууль танхимаар, аймгийн төв, нийслэлийн сургууль гурван өдөр танхимаар, хоёр өдөр теле хичээл, цахим хэлбэрээр орно.
Боловсрол шинжлэх ухааны яамнаас төрийн бус өмчийн сургууль, цэцэрлэг, МСҮТ, их дээд сургуулиудын төлбөрийг сар, улирлаар хийж болох зохицуулалт хийнэ хэмээн мэдэгдсэн. Энэ жил 150 мянга орчим оюутан их дээд сургуульд суралцах бөгөөд 2020-2021 оны хичээлийн жилд бүх их, дээд сургуулиуд сургалтын төлбөрөө нэмэхгүй байхаар тогтжээ.
2020-2021 оны хичээлийн жилд төрийн өмчийн 142, төрийн бус өмчийн 124 сургууль үйл ажиллагаа явуулах төлөвтэй байгаа аж.
Ерөнхий боловсролын төрийн өмчийн 140, төрийн бус өмчийн 117, нийт 257 сургууль үйл ажиллагаа явуулснаас төрийн өмчийн сургуулийн 7001 бүлэгт 254466, төрийн бус өмчийн сургуулийн 1905 бүлэгт 37992 нийт 8906 бүлэгт 292458 суралцагч хамрагджээ. Үүнээс бага боловсролын түвшинд 162284, суурь боловсролын түвшинд 88729, бүрэн дунд боловсролын түвшинд 41445 суралцагч хамрагдсан байна.
