Архангай аймгийн Тариат сумын малчин Э-гийн хотонд чоно орж ирж аргамжаатай морь руу нь дайрч нохойтой нь ноцолдсон тул буудаж устгасан байна.
Малчин Э-гийн гарт чоно хүрсэн учир сумын эмнэлэгт вакцин болон шаардлагатай эмчилгээ хийлгэж байгаа аж.
Чонын сэгээс энэ сарын 14-ний оройн 23.00 цагийн үед дээж авч, Архангай аймгийн Мал эмнэлгийн лабораторийн шинжилгээнд өгөхөд урьдчилсан байдлаар галзуугийн шинж тэмдэг илэрч, улсын лабораторийн шинжилгээнд баталгаажуулахаар явуулжээ.
Тариат сумын ажлын хэсэг, Архангай аймгийн Мал эмнэлгийн газар, Зооноз өвчин судлалын төв, Онцгой байдлын газрын бүрэлдэхүүн малчны хотонд очиж шархадсан мал, нохойг устгах, малыг вакцинжуулах ажил хийж байна.
