Монгол Улсын Ерөнхийлөгч У.Хүрэлсүх Үндэсний их баяр наадмыг хааж үг хэллээ

2023-07-12 0

Монгол Улсын Ерөнхийлөгч Ухнаагийн Хүрэлсүх Тулгар төрийн 2232 жил, Их Монгол Улсын 817 жил, Үндэсний эрх чөлөө тусгаар тогтнолоо сэргээн мандуулсны 112 жил, Ардын хувьсгалын 102 жилийн ой, Үндэсний их баяр наадмыг хааж үг хэллээ.

МОНГОЛ УЛСЫН ЕРӨНХИЙЛӨГЧ УХНААГИЙН ХҮРЭЛСҮХ:

“Манай улсын ард иргэд ээ,

Эрхэм хүндэт зочид оо,

Эрхэм хүндэт наадамчид аа,

Монголчууд бид Үндэсний их бахархал, өв соёлын охь, төрт ёсны бэлгэдэл, түмэн олны баяр цэнгэл – Үндэсний их баяр наадмаа ёслол төгөлдөр, өргөн дэлгэр тэмдэглэлээ.

Монгол наадам бол хүчит бөхөө барилдуулж хийморь сүлдээ мандуулдаг, хурдан хүлгээ уралдуулж цог золбоогоо бадраадаг, эвэр нумаа эвшээлгэж цэц мэргэнээ шалгадаг, төр түмнээрээ хурайлан нэгдэж, түмэн олноороо уухайлан цэнгэдэг, монгол хүн бүрийн хүсэн хүлээж хүндлэн дээдэлдэг уламжлалт их баяр ёслол, хүн төрөлхтний үнэт өв соёл билээ.  

Өвөг дээдсээс уламжлагдан ирсэн, өнө эртний түүхтэй төрт ёс, түүх соёлын үнэт өвөө монголчууд бид хайрлан хамгаалж, бахархан дээдэлж, сурталчлан таниулж, дэлхий нийтэд түгээн дэлгэрүүлж байх учиртай.

Монгол наадам бол хатуу өвлийг өнтэй, хахир хаврыг хавтай давж, налгар намрыг угтан тэмдэглэдэг нүүдэлчин түмний бахдам сайхан баяр цэнгэл мөн.

Тиймээс монголчууд бид “Наадмын маргааш намар” хэмээн хэлэлцэж, айсуй өвөл, ирж буй намрын бэлтгэлээ эртнээс базаадаг уламжлалтай.

Аливаа ажлын бэлтгэл нь амжилт бүтээлийн үндэс байдгийг санаж, төр засаг, түмэн олноороо эрч хүчээ нэгтгэж, ажил үйлсээ цэгцэлж, ирэх өвлийн бэлтгэлээ одооноос сайтар хангах хэрэгтэй.

Айл хүний амь нэг, саахалт хүний санаа нэг гэж ардын сайхан үг бий.

Бид нэг монгол, нэг гэр бүл, нэг ард түмэн гэдгээ гүнээ ухамсарлаж, хүсэл зорилго, үнэт зүйлээрээ нэгдэн нийлж, хотол түмнээрээ сэтгэлээ төвшитгөн, итгэлээ бэхэлж, эвээ зангидан, өөдрөг тэмүүлэл, өрнүүн зүтгэлээр эх орноо хамтдаа хөгжүүлэх учиртай.

Эх орны хувь заяа иргэн таны гарт бий гэдгийг ямагт санаж, улс Монголынхоо хөгжил дэвшлийн төлөө, үр хүүхдийнхээ сайн сайхны төлөө ард нийтээрээ хичээн зүтгэцгээе.

Аргамаг хүлгүүд нь хурдан, аварга бөхчүүд нь хүчтэй, эрэмгий харваачид нь цэцтэй, хотол олноороо бахдалтай, өндөр төр, өргөн түмний их баяр цэнгэл – Үндэсний их баяр наадам ийнхүү цог хийморь дүүрэн ёслол төгөлдөр өндөрлөж байна.

Мөнх тэнгэрийн хүчин дор

Аугаа Их эзэн Чингис хааны сүр хүчин дор

Монгол Улс мандан бадрах болтугай” гэлээ. 

Comments are closed.

Холбоотой мэдээ

Ногоон автобусны хэрэг мандаасан “Тэнүүн огоо” ХХК-ийн ₮75 тэрбумын хөрөнгийг нийслэл “авна”

НИТХ-ын ээлжит бус XIX хуралдаан дөрөвдүгээр сарын 29-нд боллоо. Хуралдаанаар “Тэнүүн-огоо” ХХК-ийн

2024-04-30

Монголын эрс тэс уур амьсгалд чанараараа туршигдаж баталгаажсан адууны арьсан “Хөөндий” гутал

Цаг уурч, тэнгэр шинжээчид энэ өвлийг эхэн сараасаа хүйтэрч, цас ихтэй  олон жилийн дунджаас хүйтэн

2023-11-03

Монгол Улсын Ерөнхийлөгч У.Хүрэлсүх Үндэсний их баяр наадмыг хааж үг хэллээ

Монгол Улсын Ерөнхийлөгч Ухнаагийн Хүрэлсүх Тулгар төрийн 2232 жил, Их Монгол Улсын 817 жил, Үндэс

2023-07-12